Sinesgarritasuna jokoan

Aliantzen jokoak abertzale zenbait boterera ekartzeko mentura piztu du anitz lekutan; igandean ageriko da pario onak diren

 

Bixente Vrignon eta Jojo Bidart kazetariek bi itzulien arteko analisiak egin dituzte

 

Iñaki Etxeleku Baiona

 

Bixente Vrignon kazetariak azpimarratu duen lehen gauza da parte hartzea halere mantendu dela Ipar Euskal Herrian. Zerrenda bakarra aurkeztu zen herri ttipietan, jendea saldoan joan da bozkatzera. Getarian berezitasun bat gertatu dela ere erran du: %20k xuri bozkatu dute lehen itzulian.

 

Jojo Bidart kazetariaren ustez, parte hartze horrek erakusten du ere abertzaleen gorakada egiazkoa izan dela boz kopurutan.

 

Baigorrin gertatu aldaketa aipatu dute bi kazetariek. Bidartek uste du buruetan bidea egin dela. Abertzaleak ez direla gehiago mamuak, ezker abertzalearen estrategia berria ere hor dela. Baina, oroz gain, sei urteetako oposizio lana azpimarratzen du, eta abertzalea ez den zerrendaburu baten jartzea, ohartu baitziren beste ozka baten gainditzeko zerrenda are orotarikoa egin behar zela. Duela sei urteko zerrendak bozen %27 bildu zituen.

 

Vrignonek dio interesgarria izanen dela ikustea ondoko sei urteetan boterean izanen diren abertzaleak nola jokatuko diren, zertan desberdinak agertuko diren. Lur espekulazioaren salatzea bat da, baina lehen eraikitzeko baimena errefusatuko dutelarik, gauzak nola joanen dira. Segitzekoa ere izanen da abertzaleen arteko koherentzia haren ustez. «Aski da ikustea Hazparneko Elkargoan nola iragan den orai arte», dio France Bleu-koak. Lekornekoek betoa jarri zuten eskoletarako, Garroko barazki biologikoekin, adibidez. Ikastolen aferetan ados izanen ote dira beti abertzaleak, ala herriari lehentasuna emanen dute?

 

Bidartek uste du bortxaz etorriko dela abertzaleen koherentzia hori, Hego Lapurdin egin duten bezala.

 

Herri elkargoetako buruak

Herri elkargoetako lehendakarien hautaketan sorpresak izan daitezkeela uste du Vrignonek. Hirugarren itzuli «mentsa» ikusten du. Duela sei urte, Hego Lapurdikoan denek Peyuco Duhart goaitatzen zuten, eta Michel Hiriart hautatu zen.

 

Garazi-Baigorrikoan, ez bada aldaketa nagusirik ere, jokoak izanen direla uste du Bidartek. Donazaharreko auzapezak lehendakaritzarako asmoak balituzke, Jean Michel Galantek ere ez du iduriz baztertzen berriz aurkeztea.

 

Baiona hirigunekoan ere segitu beharko da. Jean Rene Etxegaraik konpreniarazia du lehendakaritza gogoko duela. Michel Veunacek ere bai. Adinari so eginik, badaiteke beste paradarik ez izatea ondotik.

 

Ezkerrera markatu

Abertzaleak Ezkerreko Frontearekin ikustean koherentzia bat da azkenean, Vrignonen ustez. Abertzale eta ezkertiar erraten baitzen orain arte, denentzat hain argi izan gabe ere. Hor gauzak argitu ditu, jakinez gainera zurrumurruek diotenaz Etxegaraik proposamen pisutsua egin ziela Baiona 2014koei: hiru axuant postu eta jarleku bat hiri elkargoan. Aldi honetan abertzaleek frogatu dute, beraz, ezkerreko koherentzia bat, irratilariaren ustez. Ez da segur, gainera, abertzale mugimendu guzia aski ondua denik horren ulertzeko, nahiz haren ustez mugimendu bat horrela ere eraikitzen dela.

 

Beste gisakoak dira gauzak Hego Lapurdin, abertzaleek akordioak egin baitituzte sozialistekin. Vrignoni iduritzen zaio sozialista «euskaltzaleak» indartzen dituztela abertzaleek, sozialista «jakobinoen» parean.

 

Elkargo handiagoei buruz

Elkargoen norabidea eztabaidatuko dute asteleheneko hautetsi berriek. Vrignonek Baxenabarreko elkargo bakarra jiten ikusten du, estatuak, dotazioen mehatxuarekin, behartuko baitu. Menturaz, Xiberoarekin lotzeraino; ez dela baztertzekoa. Errobi eta Hazparneko herri elkargoen biez bat egitea aipatua da ere. Bidaxunekoa lotuko dieten horiei ala Baxenabarreri? Galdera hor da.

 

Gero bada Baiona hirigunekoa. Ez ote da handituko? Egiazko helburua ez da Seignanx lotzea, Vrignonen ustez, baina bai Arbona eta Arrangoitze, lur erresalbuak han baitira.